Connie Luyt is Ena Constantia Roux gedoop in Malmesbury in die Kaap. Voor skool het haar ouers na Salisbury in die destydse Rhodesië getrek waar sy in Engels begin skoolgaan. Op 11-jarige ouderdom kom hulle terug Johannesburg toe. Sy kry ’n BA met Engels, Afrikaans en Geskiedenis as hoofvakke aan Tukkies, waar sy ook haar man Daan Luyt ontmoet. Hulle het drie kinders en nou ook drie kleindogters en bly al sedert 1971 in Pretoria in dieselfde huis in ’n tuin met baie bome en kamers vol boeke en tydskrifte. Sy het eers in die 1990’s begin skryf vir publikasie. Daar staan sewe van haar eie boeke op haar rak en etlike kortverhale en artikels het al in tydskrifte verskyn.
